Kamusta Eon?

Pilang buean eot-a nga owa hibutangi rayang site.
Ku Pebrero 22, 2008, naghiwat it pagpadungog ro Aklan Catholic College (ACC) in collaboration with Gabriel Reyes Memorial Foundation ag ro NCCA sa gym it ACC, Kalibo. Ako ro guest speaker. Rang lecture hay: The Re-Emergence of Aklanon Literature.

Igto hakita ko si Alex de Juan, Rommel constantino, June Mejares, John Barrios, Weng Tamayo, ag iba pa nga writers it Aklan.

Si Alex hay nagaturo makaron sa STI Kalibo ag sa ACC pagkatapos nga mag-obra sa De la Salle University.

Pagkatapos it lecture ko hay may poetry reading.

Isaea sa mga ginbasa ko hay rayang binaeaybay (revised eon ra ugaling ag ro Tagaeog version rato)


Ano Ngani Ro Inyong Gintug-an?

ni
Melchor F. Cichon
Febraury 2008


Ano ngani ro inyong gintug-an?
Kahilwayan! Kahilwayan
Sa Banwang Pilipino!
Hay, ano ro natabo?
Nahukas baea ro kuko it banog
Sa tagipusuon it mga Pilipino?
O, bulahan ka Mt Pinatubo!

Ano ngani ro inyong gintug-an?
Mag-First Filipino Policy kita
Agod mag-ugwad ro banwa ngara.
Hay, ano napahamtang baea?
Pinoy baea ro tag-ana
It mga minahan at mga megamol riya?


Ano ngani ro inyong gintug-an?
Mangin haeangdon it uman ro banwang ngara.
Hay, ano naeukit baea sa bato?
Bukon abi’t ginkandaduhan mo ro mga peryudiko
Ag ratong mga nagkuntra kino hay pinasalvage mo?

Ano ngani ro inyong gintug-an
Pagtindog naton sa EDSA?
Iya sa EDSA mabangon kita.
Hay, ano nakadaeangan baea ro tug-an ninyo?
Hadakpan baea ro utok sa pagpatay king bana?
Nakabatak baea ro dueaw mong eambong sa kaban it mga Filipino?


Ag sa pag-eumpat mo sa EDSA,
Eumagpak ka sa Palasyo.
Hay , ano ngani ring gintug-an?
Kaya natin ito!
Hay, ano ro natabo? Kaya kita tanan!
Ro kidnapan baea ag kurapsiyon sa aton
Nasumpo sa tabako mo?
Owa’t igbata, owa’t amigo
Ro gintug-an ninyo sa Quirino Grandstand
Hay, ano ro ending?
Ro EDSA hay ginsugpunan
Ag ra punta hay sa taeangkungan.

Ano ngani ro inyong gintug-an?
Ro reconciliation ro atong kinahangean.
Agod bumaskog rayang republika.
Ag sumumpa ka nga indi eon magpadaeagan.
Hay, bukon abi’t naeansang ring tug-an?
Maski may tunok eon ring mga siki,
Sige man gihapon ro laban ku Mayo 2004.

Ano, mamati eon man kita
Sa mga boladas ni Ronnie ag ni Roco?
Ro mga kolor nanda hay abu
Pareho ku mga nakaaging mga panggulo.

Makaron nga sa Palasyo ka eon man.
May suea baea ag humay ro among mga pinggan?
May sampunang eugta baea ro kata pamilya?
Si Trillanes baea ag si Kumander Posa makalamano pa?

Ro $2.7 Bilyon baea nga budget it Pilipinas
Hay makaagto sa mga batsehon nga daean,
O sa gatueong bubunga’t eskuylahan,
O makagise eang it mga buesa it kada kongresman?
Tabang! Tabang! Cardinal Sin, siin ka?