Monday, December 17, 2007

Poems by Edmund Saldivia

The following poems were sent to me from the Kingdom of Saudi Arabia where he works. Pls. see more about the poet at the end of his poems.--Melcichon

Litanya It Puderoso Ag Manggaranon

Abo ro nag-usik it dugo sa Luisita,
Pero owa hieakot sa reporma.

Ro puderoso ag manggaranon,
Indi dapat paglangulanguhon.

Owa habawi asta makaron,
Ro manggad ku diktador nga tinipon.

Ro puderoso ag manggaranon,
Indi dapat paglangulanguhon.

Ro gasieinggit sa karsada,
Nagakaeaduea, owa eon kita-a.

Ro puderoso ag manggaranon,
Indi dapat paglangulanguhon.

Owa’t piring ro mata ni Justisya,
Kung ro kaatubang mabahoe ag kilaea.

Ro puderoso ag manggaranon,
Indi dapat paglangulanguhon.

Ro presidenteng nahusgahan,
Hato sa daean ga dayan-dayan.

Ro puderoso ag manggaranon,
Indi dapat paglangulanguhon.

Ro gapadumaea it atong nasyon,
Mas ginapaboran ro mga korporasyon.

Ro puderoso ag manggaranon,
Indi dapat paglangulanguhon.

Gabag-o pa baea ro panan-awon,
O daya man lang gihapon?
Kung owa’t puderoso,
Owa man it manggaranon.


The following poems are Edmund's reflection on the Pilipino pscyh.

Politico

Hato si gob, mabuot, sa tawo maeapit.
Hato si gob, rong konboy gasumpit,
Kilaea ro pobreng parihas kakon,
Ginapangamusta pag-adlaw it eleksyon.

Artista

Si Lito ag si Ramon Junior,
Binoto ko sa pagka-sinador.
Hay sa andang mga pelikula.
Matikas, maisog, sanda ro bida.

Family Planning

‘Ga, abo eon ro atong saeagdon,
Ngani aton eon nga planohon.
Ay, ayaw magpati sa doktor ngato,
Saea sa Dios, singhan ku kura-paroko.

Eskort Serbis

Gakapyot si Inday sa kaibahang turista
Owa gina-atuha ro tsismis tungod kana.
Bukon mat-a sanda ro gasagod,
Sa pobreng pamilya, matuod.
Kahuy-anan pwedi kong tunlon,
Pero gutom kaya kang patumbahon.

Sueat

Sa ginapalangga kong Diego,
Birtdey ni Toto sa dayang Domingo.
Kahueuya man kung indi ko iselibrar,
Hay hasayran ro ama una sa Qatar .
Kung indi ka eagi maka-padaea,
Utangon ko anay sa bombay iya.
Ro imong kasakripisyong asawa,
Sylvia.

Piesta

Patyon koeon man ang baboy nga alaga,
‘Sang dag-on ko man dang ging pataba.
Agud may ieatag, may ipakaon,
Sa mga tawong ga bisita kamon.
Hay raya ro nabugtawang tradisyon,
Halin pa sa kalololohan namon.

TxT ni Mmi Ky Ddi

5 dg-on k eon owa k uli,
Tga buean ing PDea gCNgKri.
BC my KriD k eon una Bea,
Hi owa eon Kmi nimo giN-a2H.
AnDm k kung M2od ang suspetS,
Pu2eon ko gid ro imong P2L.
Ur luv, SmeralD.


Hay Ano Eon Kita?

Kung ro doctor, sa narsing gapanaba
Agod sa Amerika ro tugpa,
Hay ano eon kita?

Kung ro maestra ginapasueabi
Ro puti nga estudyante,
Hay ano eon kita?

Kung ro ga-uli nga OFW
Owa’t trabahong siguro,
Hay ano eon kita?

Kung call-center ag turista
Ro ginapabugae nga industriya,
Hay ano eon kita?

Kung ro utang ni lolo
Utang man ku anang apo,
Hay ano eon kita?

Ekonomista ka baea.
Hay ano eon kita?
Abi sabta.

@@@

Cacique
(Rent-Seekers)

Ku panahon it Kastila,
Ro cacique bugana.
Sanda ro ginasaligan,
Ku eugta it simbahan.

Ginatunga do patubas,
Sa mamueogon may bawas.
Sa mangunguma ikap-at nga parte,
Ro habilin ana ku prayle.

Sa makarong henerasyon,
Ro cacique, iya gihapon.
Maeapit sa trono,
Alipores it palasyo.

Inutang nga kapital,
Si Juan ro kolateral.
Pasaka taga dag-on,
Paeas-anon naton.

Kalbong kagueangan,
Abandonadong minahan,
Basta eat-a inaywan,
Pagkatapos panginpuslan.

Ma-inpluwensyang anino,
Sa tugpa-an it eroplano.
Kontrolado ro kargamento,
Sa daungan it barko.

Tubi ag kuryente,
Sa alima ga-agi.
Yutilidad monopolyado,
Pasilidad manipulado.

Owa’t mayad nga amot,
Sa agrikultura ag industriya.
Parasitiko,
Sa ikonomiya it banwa.


Hinanakit Ni Adan
Tukturuok sa ka-aganhon,
Gapukaw, gapabangon.
Kakak ro pamahaw,
Imaw man do ihapon.

Pirmeng owa’t saea,
Imaw eang ro tama.
Ana ro desisyon,
Ikaw do baeasueon.

Mga mayad nga hinimu-an,
Indi madumduman.
Katukatong kasae-anan,
Ginabalik-balik, indi malipatan.

Gina-obrang opisyo,
Magbantay it tawo.
Mamintas it ugali,
Pag-eaom mo Santo.

Ro kaingod may makara,
Ro katabok may makato.
Kung ano ro una,
Indi makuntento.

Kung ana kang pangutan-on,
Madaeum mo gid nga isipon.
Hay basi ro ing sabat,
May kaibahang sibat.

Indi ma-aywanan,
Indi mabayluhan.
Hay imong ging-aku,
Sa altar it simbahan.

Kung amat ginapaino-ino,
Tuktukon it pinong-pino.
Ieubong it hipos,
Agud kalbaryo matapos.

Ayaw paghambaea,
Owa ka ka-ekperyensya.
Maski isaea ku ang sinugid,
Kung ‘sang pinggan kamo ni Eba.


About the Poet:

The poet is from Kalibo, Aklan. He now works in KSA.
Here is what he told me about himself:

"I was an editorial cartoonist in our school newspaper during my university days. I got two degrees. Besides my computer background, I’m also a licensed engineer and a System Analyst on my current job. I love books, I collect them (if my budget allows), mostly pertaining to science, history and economics. But I prefer the writing style of Carl Sagan and our very own Ambet Ocampo. Informative but fun to read. I also blog. A frequent commenter on the site of our local bloggers."

Monday, December 10, 2007

Aswang

aswang ka kuno
ginakahadlukan
ginapaeagiwan
ginalikawan
ginakaandaman
nagabag-o it hitsura
bungkoe it eab-as
nga dugo
it eapsag?

a, imaw man gali
pirme ka sa idaeom it baeay
sa imong nabdos nga kaeapitbaeay.

hay basi, ham-at
nagawakae, nahangit
isaea ka adlaw
ro asawa it nabdos
nimo nga kaeapitbaeay?


ni Perry C. Mangilaya
Bagacay, Ibajay, Aklan